علاش ختاريتي صناعة المحتوى و مخدمتيش فمجال التخصص ديالك أي الهندسة؟
 
صناعة المحتوى بالنسبة ليا هواية  و شي حاجةًلي كنبغيها وًكنلقى راسي فيها يعني انا مختاريتش بيناتهم والوقت لي بديت فيه صناعة المحتوى كنت باقا كنقرا
 
البداية ديالك كانت فمنصة يوتوب  لكن مؤخرا وليتي مركزة كتر على أنستغرام و تكطوك،  واش السبب هو أن الأرباح فيوتوب ولات أقل ؟
 
انا رتاحيت بزاف لتيكتوك حيت كنحس براسي قريبة بزاف للمتابعين ديالي، اما يوتيوب كيخصو بزاف  تصوير ومنطاج…ماشي مسألة فلوس ولكن الناس ولات كتفضل تفرج فمقاطع قصيرة فتيكتوك على انها تفرج فيديوهات فيوتيوب
 
عاقلة على أول فيديو بارطاجيتي ؟
 
‏ الفيديو للي تشهرت بيه كان تحط بصدفة، لكن رسميا أنا أول فيديو حطيت أنا كان قصة التعارف ديالي أنا وزوجي
 
كفاش كانت ردة فعل العائلة ديالك منين دخلتي لهاد المجال ؟
 
كانو أكبر داعمين ليا بالعكس بابا أول واحد دعمني و كيدعمني فأي حاجة بغيت ندير و من مورا ما بديت بدا حتى هو كيصور معايا. الله يخليه ليا هو و ماما يا رب
 
شفناك مؤخرا مع شركة "كالبي" ، شنو تقدري تقولي لينا على التجربة ديالك مع هاد الماركة المثيرة للجدل ؟
 
صراحة التجربة ديالي مع الشركة ديال كالبي زوينة بزاف و تعلمت منها بزاف ديال الحاجات منهم ان خاصك ديما تفرق ما بين الخدمة و الحياة الشخصية
 
مؤخرا مشيتي لتركيا على قبل واحد العملية، كاين اللي كيقول عملية تجميل و كاين اللي قال تكميم المعدة، وضحي لينا أكثر
 
أنا درت بالون المعدة، هي عملية صغيرة كتعاون على إنقاص الوزن و من مورا 6 شهور كيتحيد
 
خرجات واحد المؤثرة ببعض التصريحات كتقول أن داك المصحة نصبو عليها و على الناس اللي جاو من طرفها، واش تلقيتي نفس التعاليق من عند الناس ؟
الصراحة التجربة ديالي مع الكلينك كانت زوينة بزاف انا تصدمت فاش قريت دوك التصريحات حقاش داكشي اللي عشت ف تركيا كان مختالف على داكشي اللي تقال الحمد الله انا عاملوني مزيان
 
شنو المشكل بينك و بين رباب الباني ؟ واش كتنفي الإشاعات اللي كتقول أنها خلقات ليك مشاكل فحياتك الزوجية ؟
 
ما عندي حتى شي مشكل مع رباب ممكن متفاهمناش فشي حاجات ومابقاتش العلاقة بحال قبل لكن عادي أي صحبات مرة مرة كيتخاصموا وهاذ الشيء ما عنده حتى شي علاقة بحياتي الزوجية